Desse spela gler vi oss til i november
Gløym alt som heiter skule, jobb og sosial omgangskrets den komande månaden.
November er ein vanskeleg månad. Eg blir redd. Tanken på alt som ramlar inn døra av spel er nok til å få lett panikkangst av, og når store delar av det i tillegg har ein stygg tendens til å vere av så god kvalitet at det bør spelast, og spelast lenge, då går det hardt utover det meste som heiter liv og sunt folkevett.
Det kjem så uhorveleg mange storspel denne månaden at det er umogleg å få plass til alt. Oktober starta kanskje hausten for alvor med perler som Dark Souls, Batman: Arkham City og Battlefield 3, men hallo, dette er ingenting. No kjem det eine spelet etter det andre og det å velje ut nokre viktige kandidatar for denne lista er ein jobb eg hatar å måtte gjere. Eg veit at uansett kva eg gjer, så vil nokon reagere.
Difor har eg tenkt å gjere ein liten vri. Eg skal utvide den typiske dosa med spel med noko sånt som 200% berre for at du skal få litt meir å lese om, og jeg kastar ikkje bort meir tid på å snakke om alt det koselege som skjedde i oktober.
Uncharted 3: Drake's Deception
Plattform: PS3
Ute: 2. november
Årets, største, viktigaste og mest kritikarroste PlayStation 3-spel lev tydelegvis opp til forventningane. Vår mann Nathan kastar seg ut i atter ei ny klimasone og vitjar denne gongen den gloheite ørkenen. Som vanleg kan du vente deg eit spel som igjen sprenger grensene for kva PlayStation 3 kan yte reint teknisk. Det herskar ingen tvil om at Naughty Dog kan sine grafiske saker, og dei er ikkje redde for å vise det.
Utover det blir det som vanleg spretten akrobatikk i diverse miljø, nokre tapre turar på utsida av eit fly, eit drukningsforsøk, og ikkje minst intense skyteepisodar mot folk som verkeleg ikkje likar eventyrarar. Det er godt vi har Nathan og Elena si kjærlege krangling til å halde motet oppe i slike tøffe tider.
Les meir om Uncharted 3: Drake's Deception
BlazBlue: Continuum Shift 2
Plattform: 3DS og PSP
Ute: 4. november
Det er ikkje nok solide slåssespel på våre kjære handkonsollar, men no får vi ei lita vitamininnsprøyting. BlazBlue er kanskje ikkje blant dei mest kjende slåssespelseriane for folk flest, men tru meg, det er ein av dei beste. Serien ofrar 3D og fancy schmancy teknologi til fordel for todimensjonale og lekkert animerte figurar. Det er all grunn til å tru serien vil kome til sin rette på 3DS og PSP.
BlazBlue: Continuum Shift 2 byr på eit fargerikt persongalleri med figurar du berre finn i Japan. Det blir spanande å sjå korleis spelet sitt kontrollsystem taklar overgangen frå konsoll til dei må portable maskinene. Ein ting er i alle fall sikkert, BlazBlue: Continuum Shift 2 vil bli eit fargerikt og annleis tilskot til slåssespelbiblioteket.
Les meir om BlazBlue: Continuum Shift 2
The Lord of the Rings: War in the North
Plattform: PC, Xbox 360 og PS3
Ute: 4. november
Dette er godt mogleg det spelet eg gler meg mest til i heile haust, og det er ikkje fordi vi reiser tilbake til Midgar. Nei du, dette spelet er høgst lovande av heilt andre grunnar, for det er Snowblind Studios som står bak utviklinga, og har tidlegare laga Baldur's Gate: Dark Alliace, eitt av tidenes beste spel for sofasamarbeid.
Samarbeid blir viktig i War in the North òg. I denne blodige vinklinga på Tolkien si verd kan du spele saman med opp til to andre spelarar, der kvar person inntek ei spesiell rolle, og samarbeid blir uhyre viktig. Her gjeld det å bruke sine individuelle eigenskapar for alt dei er verd om ein skal overleve fjelltroll og orkar. Eg prøvde det for noko over eitt år sidan, og allereie då var det ei fantastisk oppleving.
Les meir om The Lord of the Rings: War in the North
Call of Duty: Modern Warfare 3
Plattform: PC, Xbox 360 og PS3
Ute: 8. november
No skal det bere eller breste. Sjølv om Infinity Ward har hatt ei solid innvendig krise sidan Modern Warfare 3 har ikkje det hindra dei frå å vere fullstendig klare over at større alltid er betre. Om du trudde du hadde sett krigføring før får du tru om igjen. No skal verdas store og flotte byar bli kaotiske krigssoner, og det herksar vel fint lite tvil om kor vidt dette blir ei eksplosiv affære.
For å få spelet ferdig har Infinity Ward fått med seg det nyoppstarta Sledgehammer Games som har eit par tidlegare Dead Space-gründerar bak roret, så det herskar ingen tvil om at det er nok av talent som sørgjer for å styre Call of Duty-skyta trygt i hamn i år òg. Ekstra spanande blir det derimot å sjå om Battlefield 3 har prestert å lage skrammer i lakken til Activisions blankpolerte limmo.
Les meir om Call of Duty: Modern Warfare 3
The Elder Scrolls: Skyrim
Plattform: PC, Xbox 360 og PS3
Ute: 11. november
Få vestlege rollespelseriar møter større respekt enn Bethesda sin smått legendariske Elder Scrolls-serie. Heilt sidan Arena blei lansert i 1994 har fantasiverda Tamriel bydd på massive verder med så mykje å gjere at du kunne bruke hundrevis av timar og likevel ikkje få med deg alt.
Om Skyrim byr på det same gjenstår å sjå, men om ein ting er sikkert så er det at dette definitivt set ny grafisk takhøgd for serien. Vi reiser til det kalde nord der vikinglandsbyar og mektige dragar er blant hovudingrediensane, og med drageblod i årane reiser du ut på eventyr. I Skyrim kan du gjere alt frå å kjempe mot alskens beist og utyske i grotter og mørke skogar, til å gifte deg. Som vanleg kan vi vente oss sideoppdrag og ekstrainnhald som rivaliserer hovudhistoria, så det er berre å kjøpe inn proviant for nokre veker, for dette kan ta tid.
Les meir om The Elder Scrolls: Skyrim
Assassin's Creed: Revelations
Plattform: PC, Xbox 360 og PS3
Ute: 15. november
No skal vi endeleg få vite alt! Den mystiske historia om Ezio er i ferd med å møte sin slutt, og no skal alt avslørast, trur vi i alle fall. Ubisoft har gjort eit lite kunststykke med Assassin's Creed-serien. Ikkje berre har dei kome seg inn i ein solid rytme der dei dyttar ut eit nytt spel kvart år, men i tillegg har kvart spel vore betre enn det førre. Om så er tilfelle med Revelations har vi all grunn til å glede oss.
Denne gong legg vi turen til Konstantinopel, og vi møter ein eldre Ezio. Alder er derimot inga hindring for akrobatikk som kanskje høyrer meir heime i dei Olympiske Leikar. Vi gler oss stort til å sjå kva nyvinningar og kreativt påfunn Assassin's Creed har å by på i denne omgang.
Les meir om Assassin's Creed: Revelations
Halo: Combat Evolved Anniversary
Plattform: Xbox 360
Ute: 15. november
Det bør eigentleg ikkje stort meir til enn «Truth and Reconciliation» og «Warthogjump» for at ein kvar oppegåande, sunn og anstendig person i høg nok alder til å ha erfart Halo blir sveitt i buksa. Halo er tilbake folkens, og eg snakkar ikkje om eitt nytt spel i Halo-universet. Eg snakkar om Halo, spelet som omdefinerte fysikk med sine fantastiske granatar som fekk mekaniske farkostar til å fly som kanonkuler gjennom lufta.
Kanonkuler og det beste nattbrettet gjennom historia er to grunnar aleine til at du bør overnatte utanfor næraste sjappe før lanseringa 15. november. Halo er tilbake, og eg ser fram til å atter ein gong vie meiningslaust mange timar på youtube for å studere betre framgangsmåtar for å få til det perfekte granathoppet med Warthog.
Les meir om Halo: Combat Evolved Anniversary
Jurassic Park: The Game
Plattform: PC, Xbox 360 og PS3
Ute: 15. november
For alle som var unge og lovande då Jurassic Park storma over kinolerreta i vår langstrakte land er 15. november eitt av årets store høgdepunkt. For ein serie som har vore kriminelt oversett dei siste åra er det no endeleg på tide med eitt gjensyn. Heldigvis har ikkje Telltale Games valt den billege og kjipe løysninga med å lage eit generisk skytespel der vanlege folk skal skyte raptorar med minigun.
Telltale ser ut til å ha forstått essensen av Jurassic Park. Vanlege folk i møte med noko spektakulært. Ein kamp for å overleve, i staden for rein krigføring. I Jurassic Park: The Game må du løyse mange utfordringar og problematiske situasjonar som dukkar opp, og om du feilar er aldri skarpe og sagtagga tenner langt unna.
Les meir om Jurassic Park: The Game
Anno 2070
Plattform: PC
Ute: 17. november
Anno-serien har tradisjonelt handlar om svunne tider, men no tek serien eit hopp inn i framtida. I staden for seglskuter og hest med påfølgjande kjerre blir det no morgondagens teknologi og aktuelle problemstillingar. I Anno 2070 møter du mange økologiske utfordringar i ei verd der klimaendringar og forureining har øydelagt mange tidlegare fruktbare område.
Korleis du vel å takle desse problema vil få mykje å seie for korleis sivilisasjonen din utviklar seg. Både innbyggjarane sine ynskje og behov, samt korleis bygningane ser ut vil alle bli forma av dine val og gjerningar. Samtidig er du ikkje aleine i verda, og vi møter to forskjellige fraksjonar som ser heilt ulikt på korleis verdssituasjonen bør handterast.
Les meir om Anno 2070
Need for Speed: The Run
Plattform: PC, Xbox 360 og PS3 Ute: 17. november
Dette spelet kan nok skape litt konflikt i racingmiljøet. Her er det ikkje nok med å tråkke pedalen gjennom golvet i god Flåklypa-stil, men her skal du faktisk springe til fots gjennom knappetrykkesekvensar òg. Kor omfattande denne biten er vitast ikkje, men vi veit den er der, og vi ser litt skeptisk på den.
Utover det har The Run mykje spanande å by på. Det følgjer tett i spora til Need for Speed: Hot Pursuit og byr på mykje av dei same systema, i tillegg til at autologgen er tilbake. Forskjellane er likevel tydelege. Her skal du kome deg frå ein ende av USA til den andre, og du må gjennom fleire ganske så halsbrekkande situasjonar. Å fyre laus turboen medan du fresar gjennom eksplosive steinras på eit snødekt fjell er kanskje ikkje den typiske definisjonen av ein søndagstur, men her er det berre oppvarminga.
Les meir om Need for Speed: The Run
Saint's Row: The Third
Plattform: PC, PS3 og Xbox 360
Ute: 18. november
Årets mest smaklause spel! Kan nokon eigentleg krangle på det når vi snakkar om eit spel som let seg sjølv promotere på E3-messa i Los Angeles ved å hyre inn ein flokk med kriminelt vakre jenter i lilla bikini for å vakse bilar? Det var det eg trudde.
Det er vanskeleg å vite kva ein skal seie om dette spelet. Det er Grand Theft Auto sitt forskrudde og beksvarte får, og det viser ikkje respekt for noko som helst bortsett frå spelaren som utviklarane ser ut til å forgude. Om du kan finne eit spel med større moglegheiter for å skreddarsy din eigen figur fortener du ein saftig premie. Dette spelet handlar om pupp, vald, vulgær humor på eit krakilsk fjortisnivå. Berre sjå føre deg seksualundervisninga i 10. klasse etter at alle gutane har sprunge rundt i Steelport og daska prostituerte med ein gigantisk, lilla dildo. Eg gret for framtida.
Les meir om Saint's Row: The Third
The Legend of Zelda: Skyward Sword
Plattform: Wii
Ute: 18. november
Det er høgtid kvar gong eit nytt Zelda-spel er på veg. Link er den eldste og viktigaste eventyrhelten vi har i bransjen, og med tanke på den kvaliteten som stort sett pregar alt han er med i, er det ikkje rart at alle hjarte gler seg akkurat no.
Skyward Sword er derimot ganske spesielt. Dette er det første Zelda-pelet som er utvikla utelukkande for Wii og Wiimoten. Twilight Princess var originalt berre eit GameCube-spel som fekk ein Wii-versjon. At Nintendo kan sine saker veit vi frå før, men det blir likevel uhyre spanande å sjå kva resultatet blir når dei kjem med eit spel som satsar på å bye på skikkeleg sverdfekting med Wiimoten. I tillegg lovast det at spelet blir heilt enormt, så om du enno ikkje har nok å fylle hausten med er det berre å planleggje sjukedagane.
Les meir om The Legend of Zelda: Skyward Sword
Rayman Origins
Plattform: Xbox 360, PS3 og Wii
Ute: 24. november
Rayman har utfordra seg i mang ein sjanger og dimensjon. Det er derimot veldig lenge sidan han har fått lov til å utfolde seg i eit skikkeleg todimensjonalt plattformeventyr. No er tida derimot komen, og Ubisoft med Michel Ancel i spissen lovast vi eit heidundrandes eventyr så vakkert at kjeften din godt mogleg treff parketten med eit smell.
Utviklarteamet har bygd opp sitt eige animasjonssystem som let dei skape nydelege animasjonar i ei todimensjonal verd, og det herskar liten tvil om at det er dette som først og fremst vekker oppsikt med spelet. Det er nok derimot meir til dette spelet enn innpakninga. Rayman Origins ser ut til å by på skikkeleg kvalitetsplattform med mange utfordringar, og ein solid fleirspelarmodus der du anten kan samarbeide eller konkurrere mot vener eller fiendar. Rayman er tilbake, og det er ikkje for tidleg.
Les meir om Rayman Origins
Tales of the Abyss
Plattform: 3DS
Ute: 25. november
Det einaste japanske rollespelet i november er strengt tatt ikkje heilt nytt, men det er derimot knallbra. Dette PlayStation 2-spelet kom aldri til Europa i si originale form, og det er difor gledeleg at vi omsider får lov til å ta del i moroa, til og med før amerikanarane som ikkje får spelet før på nyåret.
I Tales of the Abyss møter vi Luke von Fabre, ein litt egoistisk ung mann som i god tradisjon må leggje ut på eit omfattande eventyr for å redde både det eine og det andre. I typisk Tales of-tradisjon kan vi vente oss eit fargerikt og sprekt eventyr med eit solid persongalleri, mykje humor og eit fantastisk og intenst kampsystem. Det har vore ei solid JRPG-tørke så langt i år, så dette vil bli eit fint plaster på eit ope og blødande sår.
Les meir om Tales of the Abyss
Super Mario 3D Land
Plattform: 3DS
Ute: 25. november
Ikkje berre får vi eit nytt Zelda-spel i år, men Mario er tilbake òg. Ikkje at han har vore lenge borte, men spela hans plar vere noko for seg sjølv, og forhåpentlegvis blir ikkje Super Mario 3D Land noko unntak. Dette spelet kombinerer tradisjonell 2D-plattforming med 3D og vil la oss springe rundt i eit sideskrollande landskap på jakt etter den kjende og kjære flaggstanga på enden av nivået.
Som i alle Mario-spel med respekt for seg sjølv blir det nok solide utfordringar og diverse kreative gjenstandar som gjev Mario nye eigenskapar. Vi kan vente oss gjensyn med både eldblomen stjerna, men eg lurer eigentleg litt på kvar det blir av kappa frå Super Mario World. Historia er som vanleg ikkje noko vi eigetnleg bryr oss om, men om du på død og liv må vite det så har Bowser kidnappa prinsesse Peach... igjen.
Les meir om Super Mario 3D Land
Overdose
Som du ser er det ikkje akkurat få spel på veg i november, og lukke til med å få tid til alt. Det blir faktisk enda verre, for vi er ikkje ferdige! Det er mange spel som ikkje har fått plass på vår liste, og mange av dei kunne sikkert ha vore der. Spesielt ABBA: You Can Dance har eg stor tru på.
Av meir obskure titlar finn vi derimot GoldenEye 007: Reloaded som tek den oppussa Wii-versjonen av klassiske GoldenEye og pussar den opp enda litt til. Raving Rabbids er tilbake for enda litt meir sosial galskap, og for born og vaksne i alle aldrar er Sonic tilbake i Sonic Generations der du får spele både i gammal sideskrollande stil, og i tredjeperson.
Meir skal det derimot bli. L.A. Noire kjem ut til PC, herlege Cave Story kjem til 3DS, Kirby rullar over skjermen i Kirby's Adventure Wii, og vi kan banke kvarandre gule og blå i både Ultimate Marvel vs. Capcom og The King of fighters XIII.
Er du sugen på enda litt meir godt frå Japan kjem skytehelvetegalskapen i DoDonPachi Ressurection Deluxe til Xbox 360. Er det ikkje nok med eitt japanske rollespel i Tales of the Abyss, blir omsider Persona 2: Innocent Sin tilgjengeleg på PSP.
Og der var det på tide å ta seg ein lang og velfortent pust i bakken for min del. Kos deg i november, og eg er tilbake med neste oppsummering før årets siste månad.
